فكاهيات وانتقادات المحضار !

ورى التنّار ذه الأيام واهد = ورى التفله خليّه والمشاكيك

ووين الصيد كن الحوت شارد = تعلّه يالمهب له بانوصيّك

وين الصيد ليهو كان واجد = طلع لا فوق طفّشه سعد دعكيك

وجبنا الفرن من بعد المواقد = خصاري منه يطلع عينة الكيك

ومن بعد السّره يامانكابد = رجولي والركب فيها تصانيك

ورى الصيّاد ما يبغى يساعد = بغى الا بايصك الناس تصكيك

بغى أربع ميه في حوت واحد = ومعرص عيد بايتكتكه تكتيك

ولا جاء حد معه عدّي يزايد = وتم البخص في أهل المحاويك

وعاده كل ليله في الموالد = وبعد الظهر جاء للسوق ياديك

وقال انه تعب وسهر وجاهد = وقام الفجر ساعة يصرخ الديك

ويحصل كم وكم مركب يطارد = يفك الليت له مثل الأتاريك

يظلي يوم في الصنبوق قاعد = إذا ما جاء شي حركه تحريك

وبحره ماهو عاحسب العوايد = بغى آلات ومكينه تماتيك

ولا ندري مع من هي الفوايد = معه ولا مع هذا وهذيك

ومادلحين ** جاء الكيلو مساعد = وزن حقّك وحطّه في أياديك

رخيص السعر ومثلّج وبارد = بغى له ملح وبغى له تباتيك